Tatarlar törki yäşlär könnärenä cıyına

Berençe törki yäşlär könnäre 1992 yılda Qazanda oyışa.

- Monı oyıştırır aldınnan 1991 yılnıñ öktäber ayında "Azatlıq"nıñ ikençe qorıltayı bulğan ide. Şul qorıltayda törki yäşlär könnären oyıştıru komitetı tözelde. Çaqırular küp ölkälärgä cibärelügä qaramastan iñ küp törki xalıqlar Rüsiädän buldı. Alar berençe çirtta moña moxtac ide. - dide bezgä Xalıqara törki yäşlär berlegeneñ şäräfle prezidentı, "Azatlıq" gazetası baş möxärrire Tälğat Äxmädişin.

- Üzegez belgänegezçä alar bügenge köndä qollıq xälendä yäşilär. Şuña alarnı "Azatlıq"qa omtılış berläşterde.

Çit illär belän elemtä 1993 yılda Baqu şähärendä ütkän törki xalıqlarnıñ qorıltayınnan soñ nığıy. Aña xalıqara törki yäşlär könnäre digän isem birelä. Bıyıl törki yäşlär könnäre 5 – 12 august könnärendä Makidoniadä ütäçäk. Bu çaranıñ maqsatın başlap cibärüçelär, xäzer inde Tatarstannan delegat bularaq qatnaşuçı Tälğat Äxmädişin tübändägedä kürä.

- Törki xalıqlarnı berläşterü!
Älläni zur maqsatlarğa ireşmilär-ireşüen, läkin säyäsättä, mädäniät ölkäsendä üzlären sizderälär. Xalıqara törki yäşlär könnäre 92 yıldan birle yä ike yılğa ber tapqır, yäki sirägräk ütkärelep kilgän, qayçan niçek bulu finans xälenä bäyle ikän. Bıyılğısına törle illärdän törki yäşlär oyışmalarınıñ delegasialäre cıyılır, 150 keşe bulır dip kötelä.

Tatarlardan 8 keşe qatnaşaçaq – di Tälğat abzıy.

- Tatarstannan "Azatlıq" tatar yäşläre berlege räise Damir Şäyxetdin söyliäçäk. Şul çığışlardan soñ bağışlanğan problemalarğa törle rezolusialär, möräcäğätlär qabul iteläçäk. Ber yılnı anda Seber tatarları yäşlär oyışması ayırım äğza bulıp ta kerergä telägän bulğan. Läkin…

- Böten törki xalıqlar qarşı çıqtı. Alar tatar milläten ber millät itep qabul itälär. Andıy säyäsi ağımnar bulıp aldı anda, bigräk tä Törkiä törekläre bu mäsälädä kisken itep äytte, bez tatar xalqın ber böten itep qarıybız didelär!- dip cawap qaytardı törki yäşlär könnäre veteranı, bıyılğı Tatarstan delegatı Tälğat Äxmädişin.
Bu yäşlär könnäre dip atalsa da bilgele ber yäş bilgelänmägän. Bıyılğısına Tatarstannan barası 8 delegat arasında "İrek mäydanı" gazetası jurnalistı Rimma Bikmöxämmätowa da bar.

- "Törki yäşlär könnärenä berençe tapqır baram. Elek görläp ütkän, soñğı yıllarda naçar eşlilär dip işetkänem bar ide. Bu çaradan bernidä ömet itmi Rimma. Qayber maqsatların äle kire qağa…

- Törki yäşläreneñ berläşüe ul, çınğa aşmaslıq äyber. Härberse üz mänfäğäten qayğırtıp yöri. Tatarlar ayırım, Qazan tatarları, Seber tatarları, Qırım tatarları da ayırım alar. Rimma Makedoniagä barunıñ tağın ber säbäbem çit illärne küräsem kilü di.

Röstäm İsxaqi
"Azatlıq" radiosı, 01.08.2007

Kaynak: "Azatlıq" radiosı