Makedoniyadä - Törki yaşläre könnäre uzaçak

Bıel Makedoniya şähäre Oxridta 5 avgust könne XIII Törki dönya yaşläre könnäre açıla häm korıltay uzaçak. Anıñ eşendä katnaşuçı tatar delegatsiyasın "Azatlık" tatar yaşläre berlegeneñ elekkege citäkçese Tälgat Äxmädişin citäkli. İstanbul aşa baruçı tatar yaşläre Törkiyadä dä tuktalıp Gayaz İsxakıy häm Yosıf Akçura kaberlären zıyarat kılır dip kötelä.
Törki dönya yaşläre könnäre häm korıltay berençe tapkır Kazanda uzdırılgan ide. Bu çaranı tatarlar oeştırgan. Şulay uk ul Kırımda, Kazaxstanda, Başkorstanda, Tönyak Kiprda, Rumıniyadä, Törkiyadä dä uzgan inde. Bıel da Törki yaşläre könnäre Kazanda tugan traditsiya buença, programmada kiçke kontsertlar häm uennar da karala. Şulay uk Saban tuy da yasalır dip kötelä.
13-nçe Törki yaşlär könnärendä Tatarstannan katnaşuçı delegatsiya sostavı asılda "Azatlık" tatar yaşläre ägzalarınnan tora. Alar arasında curnalistlar da şaktıy. Çallı şähärennän, xäzerge "Azatlık" räise Damir Şäyxetdin, Kazan şähärennän "İrek mäydanı" gazetası möxärrire Rimma Bikmöxämmätova kebeklär.

Tatar yaşläre törki yaşlär könnären berençe tapkır oeştırgan keşelärdän. Ul Kazanda 1992 elda uzdı. Gomumän, tatarlar törki yaşlär xäräkätendä lider bulıp ta tora. Aerım alganda, maktaulı kunak bulgan Tälgat Äxmädişin (Çallı şähärendä yaşi) berençe räis-lider bulgan ide. Ä berençe başkarma komitetı citäkçese isä Kazan kızı Zölfiya Sägdi (bügen Şvetsiyadä yaşi) bulgan.
Bügen başlangan çaranı da bötendönya törki yaşlär berläşmäse oeştıra. Anıñ citäkçese Xasan Ali Karasar xäzer Törkiyadä tora. 13-nçe Törki yaşlär könnärendä mädäni çaralarnı oeştıruda tatar yaşläre başlap yörer dip ömetlänelä. 13-nçe Törki yaşlär könnäre 12 avgustta tämamlanaçak.

1 Avgust 2007,14:06
Amil NUR.

Kaynak: Intertat.ru