Törki yaşlärne di-djey Bulat Bäyrämov bietäçäk

Rumıniyaneñ Küstäncä (Konstanta) şähärendä 4-11 sentyabr könnärendä "Unberençe Törki dönya yaşlär könnäre häm korıltae" uza. Anı Törki dönya yaşlär berlege, Törek uçakları oeşması, Rumıniya möselman tatar törkiläreneñ demokratik berlege häm Rumıniya demokratik törki berlege oeştıra. Tatarstannan könnärdä "Azatlık" TYaB häm Tatar yaşläre forumı katnaşa.

"İntertat.ru" xäbärçese Amil Nur da bu çaraga katnaşır öçen çakıru algan bulgan. Ul berençe törki yaşlär korıltayları häm yaşlär könnärennän alıp uk mädäni çaralarnı oeştıruçı bularak bilgele. Bıel da anı ber-berse xolkın añlamauçı, telen belmäüçe törki xalıklarnıñ yaş väkillärenä duslaştıruçı, berläşterüçe itep, mädäni xezmät kürsäter öçen çakırgannar. Tik Amil Nur vakıt yuklıgın säbäp itep katnaşudan baş tartkan.

Amil üzenä almaşka, "şoumen bularak täcribäle häm ictimagıy yaktan uñay energetikalı, başkalarga itägatle" dip, Rimma Bikmöxämmätovanı (Ufa, "Azatlık" TYaB ägzası, "Atna" gazetası xäbärçese) täkdim itep karagan. Tik oeştıruçılar Ufadagı Rimmanı da vizalar yasatır öçen tiz arada ezläp taba almagannar. Ul avılda yal itep kalgan.

Rumıniyada şoumen häm tamada rolen Bulat Bäyrämov ("Tatar radiosı", cırçı Läysan Gıymaevanı ire) başkarır dip kötelä. "Ul diplomat häm şayan, xäräkätçän häm muzıkal. Tatar belän bergä udmurt, başkort xolkın da öyrängän. Andıylar üzeneken dä, keşeneken dä xörmät itä belä, başkalar belän urtak telne tiz taba", - dip sanıy Amil.

"Bez tatarlar - törki xalıklarnıñ barısın da añlıy alabız häm alarnı duslaştıru sälätenä iya. Mondıy eşlär bezneñ öçen gadäti", - dip beldergän Tälgat Äxmädişin, Törki dönya yaşläre berlegeneñ liderı.

Şulay itterep populyar di-djey Bulat Bäyrämov Rumıniyada törkilär häm tatarlar belän duslaşıp, alarnıñ muzıkal mädäniyatın öyränep kaytaçak.

Aygöl İsxakova

http://www.intertat.ru/index.php?cat=lq&id=50670