Tatar yaşläre Törkiya tışkı eşläre ministrı belän bergä

Bügen İstanbul şähärendä räsmi açılgan 12-nçe Törki yaşlär könnärendä katnaşuçı tatar yaşläre Törkiya tışkı eşlär ministrı Abdulla Gul häm İstanbul şähäre merı Kadir Topbaş belän oçraştı. Törkiya däüläte citäkçeläre törki yaşlären ber-berse belän dus yaşärgä öndäde. 12-nçe Törki yaşlär könnärendä şulay uk Tatarstannıñ Çallı şähäre kızı Aygöl Möxämmätşina delegatlar häm kunaklar karşında çıgış yasap: "Bez bäyle bulgan, koloniyalärdä yaşäüçe törki xalıklar härvakıtta Törkiya yardämenä moxtac", - dip belderde. A.Möxämmätşina üze katnaşuçı korıltaynı "Yugalıp baruçı törki yaşlärdä yaña ömet uyatuçı çara", - dip sanıy. İnde "Intertat.ru" yazgança tatar yaşläre törki yaşlär könnären berençe tapkır oeştırgan keşelärdän. Ul Kazanda 1992 elda uzdı. Gomumän, tatarlar törki yaşlär xäräkätendä lider bulıp ta tora. Aerım alganda, maktaulı kunak bulgan Tälgat Äxmädişin (Çallı şähärendä yaşi häm tatar yaşläre berlege "Azatlık" räise bulıp tora) berençe räis-lider bulgan ide. Ä berençe başkarma komitetı citäkçese isä Kazan kızı Zölfiya Sägdi (bügen Şvetsiyadä yaşi) bulgan. Bügen başlangan çaranı da bötendönya törki yaşlär berläşmäse oeştıra. Anıñ citäkçese xäzer Törkiyadä tora, ä başkarma komitetı räise isä Äzerbäycanda yaşi. Şulay uk yaşlär törki dönya liderlarınnan berse sanaluçı Törkiya Yazuçılar berlege räise Yakup Deliomeroglu belän dä oçraştı. 12-nçe Törki yaşlär könnärendä mädäni çaralarnı oeştıruda tatar yaşläre başlap yörde. Alar bügen här kiçne uzaçak "Kiçke uennar"nı oeştıra başlıy. Çaralarda Kazan, Çallı, Samara, Omsk, Kiev, Ufa, Änkara tatarları katnaşa. Bıel fin-uıgr xalıkları da kunak bulıp kilgän. Gomumän alganda, Könnärdä etnik törkemneñ yaki oeşmadan väkillär dä bar. Alar üz problemaların häm urtak eş koru çaraların öyränäçäk. 12-nçe Törki yaşlär könnäre 20 noyabrdä tämamlanaçak.

Amil Nur 14 noyabr 2005, 17:21 http://intertat.ru/index.php?cat=l&id=76895